Nazarboyev “Vostochniy” kosmodromi qurilgandan so‘ng “Boyqo‘ng‘ir”ni yopish uchun sabab topmadi

Qozog‘iston prezidenti Nursulton Nazarboyev mamlakat Rossiya bilan kosmik sohadagi hamkorlikni davom ettirishini ma’lum qildi, deb xabar beradi “Interfaks”.

“Agar ‘Boyqo‘ng‘ir’ bo‘lmaganda, Rossiya bilan ishonchli, do‘stona munosabatlar bo‘lmaganda, bizning yurtdoshlarimiz kosmosga uchmagan bo‘lardi. Bu – birinchidan. Ikkinchidan, hozirgi paytda Qozog‘iston raketa uchira olmaydi, kosmodromga ega bo‘lish, kadrlar tayyorlash imkoniyati yo‘q. Biroq, biz bunga intilmoqdamiz”, — dedi Nazarboyev respublika telekanallaridan biriga bergan intervyusida.

“Hozir Rossiya tomonidan ‘Vostochniy’ kosmodromini qurish haqida so‘z yuritilmoqda, bizni bunga hech qanday qarshiligimiz yo‘q. Biroq ‘Vostochniy’ paydo bo‘lishi ‘Boyqo‘ng‘ir’ning yopilishini anglatmaydi. Shuning uchun bundan keyin ham Rossiya bilan birgalikda ishlashda davom etamiz”, — deb ta’kidladi u.

Rossiya “Boyqo‘ng‘ir” kosmodromini 1994-yilda ijaraga olgan bo‘lib, ijara shartnomasi 2050-yilga qadar tuzilgan. Kompleks ijarasining yillik bahosi 115 million dollarni tashkil etadi.