BMT Xavfsizlik Kengashi Rossiya, Xitoy, Angola va Venesuelaning qarshiligiga qaramay, 10-dekabr, payshanba kuni KXDRda inson huquqlari sohasidagi vaziyat bo‘yicha majlis o‘tkazdi, deb yozadi “TASS”.
Bahs-munozara boshlanishidan oldin Xitoy delegatsiyasi Xavfsizlik Kengashi raisi — AQSh doimiy vakili Samanta Pauerdan mavzuni XK kun tartibiga kiritishni ovozga qo‘yishni taklif qildi. Biroq o‘tgan yildagi kabi, XKga a’zo mamlakatlarning ko‘pchiligi ushbu mavzu ko‘rib chiqilishini yoqlab ovoz berdi.
Buyuk Britaniya, Iordaniya, Ispaniya, Litva, Malayziya, Yangi Zelandiya, AQSh, Fransiya va Chili yoqlab ovoz bergan bo‘lsa, Rossiya, Angola, Xitoy va Venesuela qarshi chiqdi, Nigeriya va Chad esa betaraf qoldi. Rossiya va Xitoyning veto huquqi majlisda ko‘rib chiqiladigan masalalarni ovozga qo‘yishda amal qilmaydi.
Majlis chog‘ida qator mamlakatlar, jumladan, AQSh va Birlashgan Qirollik KXDRdagi vaziyatni Gaagadagi Xalqaro jinoyat sudiga ko‘rib chiqish uchun yo‘naltirishga chaqirdi. KXDR esa majlisni boykot qildi: BMT Xavfsizlik Kengashi majlisida KXDR delegatsiyasi so‘zga chiqmadi.
Izoh (0)