Avstraliyalik yigit “Vikipediya”dagi maqolaga “tuzatish” kiritib, sevimli guruhi bilan ko‘rishdi

Avstraliyaning Peking Duk guruhi muxlisi Devid Spargo o‘zini musiqachilardan birining qarindoshi sifatida tanishtirib, Melburndagi konsertda sahna ortiga o‘tishga muvaffaq bo‘ldi, deb yozadi TJournal.

Soqchi yigitning gaplariga ishonmagach, u guruhning “Vikipediya”dagi sahifasini ko‘rsatdi. U yerga Devid bir necha daqiqalar avval o‘zi tuzatish kiritgan va birinchi xatboshi oxiriga “Family David Spargo” (“Oila a’zosi Devid Spargo”) deya qo‘shib qo‘ygan edi.

Sahna ortiga o‘tib, Spargo musiqachilar bilan tanishdi va ularga o‘z hiylasini oshkor qildi. Ular esa bundan shunchalik ta’sirlandiki, Devid haqida ijtimoiy tarmoq sahifalarida yozdi, shuningdek, konsertdan so‘ng u bilan vaqt o‘tkazib, telefon raqamini oldi.