O‘zbekistonda avtotransport vositalarining davlat raqamlari va ularning tezligini avtomatik aniqlovchi dastur yaratildi

ABL-Soft&SS mas’uliyati cheklangan jamiyati xodimlari avtotransport vositalarining davlat raqamlarini va ularning tezligini videotasvirlar oqimi orqali avtomatik aniqlaydigan “AutoSon TR.uz” dasturiy ta’minotini ishlab chiqdi. Bu haqda O‘zbekiston Respublikasi Intellektual mulk agentligi matbuot xizmati xabar bermoqda.

Ushbu dasturiy mahsulot avtotransport vositalarining davlat raqamlarini aniqlash va yo‘l harakati qoidalarini buzuvchilarni avtomatik qayd etish bilan bog‘liq masalalar majmuini hal qilishga mo‘ljallangan.

“‘AutoCon TR.uz’ dasturi obyektga yo‘naltirilgan texnologiyalar asosida ishlab chiqilgan bo‘lib, avtotransport vositalarining davlat raqamlari belgilarini tutib olish va uning tasvirlarini binarlash, raqamlar belgilarini aniqlash, videotasvir bo‘yicha tezlikni o‘lchash, yo‘lda yuz bergan vaziyatni tahlil qilish va yo‘l harakati qoidalarini buzuvchilarni aniqlash, ma’lumotlar bazasi bilan ishlash va interfeys kabi asosiy modullardan tarkib topgan”, deyiladi xabarda.

Dasturiy ta’minot mualliflari bo‘lmish A.R.Maraximov, S.S.Rasulov, Sh.X.Umarov va A.R.Maraximovga № DGU 03320 raqamli guvohnoma berildi.