Futbol bo‘yicha O‘zbekiston U-16 termasi Qatarni ikkinchi o‘yinda ham mag‘lub etdi
16 yoshgacha bo‘lgan futbolchilar o‘rtasidagi Osiyo chempionati—2016 saralash o‘yinlariga tayyorgarlik ko‘rish maqsadida Qatarda qisqa muddatli yig‘in o‘tkazgan O‘zbekiston o‘smirlar terma jamoasi o‘quv-yig‘ini davomidagi ikkinchi o‘rtoqlik uchashuvida ham g‘alaba qozondi. Bu haqda O‘zbekiston futbol federatsiyasi matbuot xizmati xabar bermoqda.
Qatar U-16 terma jamoasiga qarshi 4-sentabr kuni ikkinchi bor maydonga chiqqan Temur Olimxo‘jayev shogirdlari raqiblari ustidan 2:1 hisobida g‘alaba qozondi. O‘zbekiston o‘smirlaridan gollarni Rasul Yo‘ldoshev hamda Abdulhay Ismoilovlar kiritdi. Dastlabki uchrashuvda O‘zbekiston Qatarni 4:1 hisobida mag‘lub etgandi. Ikkinchi uchrashuvdan keyin Olimxo‘jayev boshchiligidagi jamoa Toshkentga qaytib keldi.
Eslatib o‘tamiz, O‘zbekiston o‘smirlar terma jamoasi Osiyo chempionati saralash bosqichida “A” guruhidan o‘rin olgan. Ushbu guruhda ular Yaman, Falastin va Maldiv jamoalariga qarshi maydonga tushadi. Saralash o‘yinlari 16–20-sentabr kunlari, Falastinda bo‘lib o‘tadi.
