“Sharq taronalari” o‘ninchi xalqaro musiqa festivali ishtirokchilari va mehmonlari Samarqand shahridagi Amir Temur va Alisher Navoiy haykallari poyiga gulchambarlar qo‘ydi, deb xabar beradi O‘zA.
Dunyo xalqlari o‘rtasida do‘stlik aloqalarini mustahkamlash, ularning milliy musiqa madaniyati va san’atini targ‘ib etishga xizmat qilayotgan “Sharq taronalari” musiqa festivali ishtirokchilarining Amir Temur va Alisher Navoiy haykallari poyiga gul qo‘yishi ham mazkur anjuman doirasidagi muhim tadbirlardan biridir. Yer yuzining turli mintaqalaridan kelgan san’at ahli Samarqandni yirik ilm-fan, san’at va madaniyat markaziga aylantirgan sohibqiron Amir Temur va buyuk mutafakkir Alisher Navoiy dahosiga hurmat ko‘rsatadi.
– Buyuk sarkarda va davlat arbobi Amir Temur haqida ma’lum bir tushunchaga ega bo‘lsam-da, bu ulug‘ zotning davlatchilik faoliyati, ilm-fan va madaniyat rahnamosi sifatida amalga oshirgan ishlari to‘g‘risida kam bilardim, – deydi Sloveniyaning The Balkan Rog guruhi rahbari Mosik Joran. – Kecha va bugun shahardagi tarixiy obida va muzeylarga sayohat davomida bu borada ko‘p ma’lumotlar oldim. Amir Temurning, ayniqsa, san’at ahliga alohida e’tibor ko‘rsatgani, saroyida tez-tez musiqa anjumanlari o‘tkazib turgani xalqingizning musiqa madaniyati tarixi uzoq o‘tmishga borib taqalishidan dalolatdir. Shu jihatdan bugun nufuzli xalqaro forumga aylangan “Sharq taronalari” festivali qatnashchilarining bu zaminda kamolga yetib, dunyoda dovruq qozongan allomalar haykalini ziyorat qilishi chuqur ramziy ma’noga ega.
Izoh (0)