Xitoy aviakompaniyasi vazni me’yordan oshiq havo bekalarini ishdan chetlatishda ayblandi

Xitoyning Qingdao Airlines aviakompaniyasida ortiqcha vaznga ega bo‘lgan styuardessalar ishdan bo‘shatilmoqda yoki parvozdan chetlatilmoqda. Bu haqda kompaniya xodimlaridan birining aytganlariga tayanib, The South China Morning Post xabar berdi.

Aviakompaniya matbuot xizmati kompaniyada xodimlarning bo‘yi hamda vazniga oid qoidalar mavjud bo‘lsa-da, aynan shu sabab kimdir ishdan bo‘shatilgani yoki uchishdan chetlatilganini qat’iyan rad etdi. Qingdao Airlines qoidalariga ko‘ra, kompaniyaga 30 yoshga to‘lmagan, bo‘yi 165-172 santimetr, vazni esa 50 dan 68 kilogramgacha bo‘lgan ayollar qabul qilinadi.

Xitoy fuqarolik aviatsiyasi ma’muriyati xodimlarga ortiqcha vazni tufayli intizomiy choralar ko‘rilishiga yo‘l qo‘yib bo‘lmasligi, bu inson huquqlari buzilishiga olib kelishi haqida bayonot berdi.