Qozog‘istonlik amaldorlar uchun mahalliy avtomobillar xarid qilindi

Qozog‘istonlik amaldorlar uchun yil boshidan beri 349 ta mahalliy avtomobil xarid qilindi. Bu haqda mamlakat moliya vazirligi davlat xaridlari qo‘mitasi raisining o‘rinbosari Maqsud Isaxov ma’lum qildi, deya xabar bermoqda “Nur.kz”.

“Yil boshidan beri nafaqat markaziy, balki mahalliy davlat idoralari uchun ham yengil avtomobillar xarid qilyapmiz. Olingan 349 ta mashinaning barchasi shu yerda ishlab chiqarilgan”,– deya izoh bergan amaldor.

Shu bilan birga, Qozog‘iston avtobiznesi assotsiatsiyasi ma’lumotlariga ko‘ra, mamlakatda ishlab chiqarilgan mashinalar sotuvi salkam 43 foizga tushib ketgan. Yil boshidan beri rasmiy dilerlar Qozog‘iston mahsuloti bo‘lgan 9081 ta avtomobil sotdi, bu esa o‘tgan yilgi olti oylik ko‘rsatkichdan 42,79% past.