Atlantadagi otishma oqibatida to‘rt kishi halok bo‘ldi

AQShning Atlanta shahrining shimoli-sharqiy chekkasida yuz bergan otishma natijasida to‘rt kishi halok bo‘ldi, bir kishi yaralandi. Bu haqda “TASS” xabar bermoqda.

Forsayt okrugi sherifi o‘rinbosari Robin Riganning ma’lumotlariga ko‘ra, hodisa mahalliy vaqt bilan soat 6:00 atrofida ro‘y bergan. Voqea joyiga yetib kelgan politsiya xodimlari uch qurbon va ikki yaradorni topgan, ulardan biri ko‘p o‘tmay vafot etgan.

Dastlabki ma’lumotlarga ko‘ra, turar-joy majmuasida otishma keltirib chiqargan shaxs bungacha bir necha bor politsiya tomonidan qo‘lga olingan. U yaralanganlar orasida edi.

Huquqni muhofaza qilish organlari xodimlari jinoyatning boshqa hech bir tafsilotlarini ma’lum qilgani yo‘q.