Facebook asoschisini va’dani bajarmaganlikda ayblab, sudga berishdi

Facebook ijtimoiy tarmog‘i asoschisi Mark Sukerbergga yer sotgan kishi uni sudga berdi. Bu haqda Bloomberg xabar bermoqda.

Kaliforniyalik tadbirkor Mirche Voskerisyan shartlashuvni bajarmaslik da’vosi bilan Sukerbergga qarshi chiqdi. Uning aytishicha, Facebook asoschisi yerni xarid qilish chog‘ida narxni kamaytirish evaziga tadbirkorni Kremniy vodiysi kazo-kazolari bilan tanishtirishga va’da bergan.

2012-yili Kaliforniyaning Palo-Alto nomli go‘shasida, Facebook asoschisi uyining ro‘parasida Voskerisyan yana bir bino qurmoqchi bo‘ladi. Xilvatda, tinch-osoyishta yashashni ma’qul ko‘rgan Sukerberg 1,7 million dollar to‘lab, ushbu yerni sotib oladi. Voskerisyanning da’vosiga ko‘ra esa, yerning asl bahosi 4,3 million dollarni tashkil etadi: u go‘yoki Sukerbergning va’dasiga ishonib, yerni shu narxga olishga rozi bo‘lgan afrikalik shahzoda bildirgan mo‘maygina taklifdan voz kechgan.

Hozirda Kaliforniya Oliy sudi mazkur da’voni o‘rganib chiqmoqda.