Qozog‘istonda “Qurtafello” brendi paydo bo‘ldi

Janubiy Qozog‘iston viloyatida tadbirkor Aynash Ubaydullayeva “Qurtafello” brendi ostida qurt savdosini yo‘lga qo‘ydi, deb xabar bermoqda “Uz24.uz”.

“Tengrinews.kz” yozishicha, tadbirkor qimizchilik bilan shug‘ullanib kelgan. Internetdan xaridorlarni jalb etish yo‘llarini izlayotganda, “qurtafaello” nomiga ko‘zi tushgan. G‘oya yoqib qolgach, qimiz emas, qurt sotishni reja qilgan. Uning aytishicha, mamlakat ovullaridan keltiriladigan qurtlar juda mazali va shu bois brend yaratib, odamlarni qiziqtirishni maqsad qilgan. Tadbirkor qayd etishicha, bir o‘ram qurtning narxi 250 tenge (1,3 dollar) dan boshlanadi.

Xabarga ko‘ra, Aynash Ubaydullayevaning o‘zi grafik dizayn bilan ham shug‘ullanadi, shuning uchun yangi mahsulotning logotipini yaratishda qiyinchilikka duch kelmadi. Uning aytishicha, Rafaello brendidan da’vo bo‘lmaydi. Mualliflik huquqi bo‘yicha u mutaxassislar bilan maslahatlashgan.