O‘zbekistonda Samsung Galaxy S6 smartfonlarining narxi ancha pasaydi

Janubiy Koreyaning Samsung kompaniyasi ishlab chiqargan Samsung Galaxy S6 smartfonlarining chakana narxi “Fleshka” savdo majmuasida bir hafta oldingiga qaraganda sezilarli ravishda pasaydi, deb xabar qiladi “Mobinfo.uz”.

Bir hafta oldin ushbu smartfonning 32 Gb xotirali versiyasi narxi taxminan 2,9 million so‘mni tashkil qilgan bo‘lsa, 5-iyul, yakshanbaga kelib gadjet 2,5 million so‘mdan sotila boshladi. Samsung Galaxy S6 Edge modelining O‘zbekistondagi narxi o‘zgarishsiz qoldi va 3,2 million so‘mdan sotilmoqda.

Samsung Electronics kompaniyasining O‘zbekistondagi vakolatxonasi vakillarining ma’lum qilishicha, ba’zi savdo nuqtalari Galaxy S6 smartfonlarini sotib oluvchilarni rag‘batlantirish uchun mustaqil ravishda aksiya boshladi. Aksiya doirasida smartfonni sotib olgan xaridorlar simsiz zaryadlash qurilmasini bonus sifatida tekinga qo‘lga kiritadi.