Amerikalik bokschi Floyd Meyuezer Shvetsiyada ishlab chiqarilgan Koenigsegg CCXR Trevita superkarini sotib oldi. TMZ Sports ma’lumotlariga ko‘ra, mazkur xarid uchun sportchi 4,8 million dollar to‘ladi.
Ushbu model kuzovi yaltirovchi olmos bilan qoplangan oq uglerod tolalaridan tayyorlangan. Trevita atigi uch nusxada tayyorlangan bo‘lib, vaznining yengilligi (1280 kilogramm), etanol va benzin qorishmasida harakatlana olishi, 2,9 soniyada 100 kilometr tezlikka erisha olishi va eng yuqori tezligi soatiga 402 kilometrga teng ekanligi bilan ajralib turadi.
Meyuezer – qimmatbaho va kamyob avtomobillar ixlosmandi. Uning garajida umumiy qiymati 6,2 million dollar bo‘lgan uchta Bugatti sportkari, Ferrari Enzo, Rolls-Royce Wraith va Phantom, Bentley Continental Flying Spur, shuningdek, Mercedes-Benz’ning qator modellarini uchratish mumkin. Pul va qimmatbaho buyumlarga o‘chligi ortidan u The Money (“Pul”) degan laqab orttirgan.
Amerikalik bu bokschi davrning eng ko‘p pul topadigan sportchisi hisoblanadi. Forbes talqiniga ko‘ra, 2014-yilning iyunidan 2015-yil iyuniga qadar Meyuezer 300 million dollar ishlab topgan.
Izoh (0)