Koreya Respublikasi KXDRga so‘nggi yuz yil ichidagi eng kuchlisi deb baholanayotgan qurg‘oqchilik oqibatlariga qarshi kurashishda yordam berishga tayyor. Bu haqda KR birlashuv vaziri Xon Yon Pxyo aytib o‘tdi, deb yozadi “TASS”.
“Ikkala Koreya ham ayni paytda ofat bilan kurashmoqda, va bu vaziyat hamkorlikni rivojlantirish uchun turtki bo‘lishi mumkin. Agar KXDRdagi ahvol yomonlashsa, KR unga zarur yordamni berishga tayyor”, — dedi u.
Vazirning aytishicha, Seul Pxenyandan tegishli so‘rovni kutadi.
Eslatib o‘tamiz, avvalroq Shimoliy Koreya joriy yil yozida so‘nggi yuz yildagi eng kuchli qurg‘oqchilikni boshidan kechirayotgani xabar berilgan edi.
KXDRda davom etayotgan so‘nggi yuz yil ichidagi eng kuchli qurg‘oqchilik qishloq xo‘jaligiga ulkan zarar yetkazmoqda. Yomg‘irlar yo‘qligidan butun mamlakatdagi guruch plantatsiyalari, ayniqsa Xvanxe va Pxyonan provinsiyalaridagi ekinlar nobud bo‘ladi.
Qayd etilishicha, Shimoliy Koreya qishloq xo‘jaligi 1990-yillar o‘rtalaridan buyon ham qurg‘oqchilik, ham suv toshqinlaridan bir necha marta ziyon ko‘rgan. G‘arb matbuoti bu davrda mamlakatda 100 minglab odamlar halok bo‘lgani haqida yozgan.
Izoh (0)