Checheniston rahbari Ramzan Qodirov “Interfaks” agentligiga bergan intervyusida Checheniston Respublikasi Rossiyaning boshqa mintaqalari bilan bir xilda davlatdan mablag‘ olishini aytdi, deb xabar beradi “Gazeta.ru”.
“Chechenistonni qo‘llab-quvvatlash federal tarmoq dasturi 130 milliard rubl miqdorida belgilangan, undan faqatgina 70 milliard atrofidagi mablag‘ni oldik. Buning ustiga bizning respublikamiz urush vaqtida vayron bo‘lgan. Hattoki o‘ziga to‘q mintaqalar ham federal markazdan kattaroq yordam oladi, barchaning xayolida esa faqat Checheniston”, — dedi Qodirov.
Uning fikricha, “Chechenistonga do‘st bo‘lmaganlar” mintaqani yomon ko‘rsatishga urinadi.
Qodirov Checheniston o‘zi pul ishlab topishini, ba’zi sohalarda iqtisodiy o‘sish 100 foizga yetganini aytib o‘tdi. Uning so‘zlariga ko‘ra, iqtisodiyotining o‘sish sur’ati bo‘yicha Checheniston Rossiyaning top-5 mintaqasiga kiradi.
“Biz zavod va fabrikalar ochyapmiz, soliqlar yig‘imini oshirib boryapmiz. Albatta, muammolarimiz ham yetarlicha”, — dedi Checheniston rahbari.
Izoh (0)