Voqealar rivojidan noqonuniy poyga deb taxmin qilish mumkin bo‘lgan holat ayanchli oqibatlar bilan yakunlandi. Buni “Daryo” tahririyatiga kelib tushgan videolavhalarda ko‘rish mumkin.
Videolarda odamlar yetarlicha gavjum bo‘lgan, mashinalar ham tez-tez o‘tib turgan yo‘llar kesishuvida — T ko‘rinishidagi chorrahada bir yigit oldindagi ikki mashinaga boshlash mumkinligi haqida ishora bergani ko‘rinib turadi. Shundan keyin oq Lacetti va kulrang Nexia juda katta tezlikda harakatlanib kelgan. “Marra”ga yaqinlashganda mashinalar muvozanatni yo‘qotgan, natijada Lacetti dastlab o‘sha ishora bergan kishini, keyin yana bir odamni urib ketgan.
Lavhada urib ketilgan birinchi kishi yo‘l chetida qonga belanib yiqilib yotgani va qimirlayotgani ko‘rinib turadi. “Poyga”da ishtirok etgan davlat raqami 90 969 AAA bo‘lgan oq Lacetti esa yo‘l tashqarisiga to‘siqlardan ham o‘tib chiqib ketgani, eng achinarlisi, urib ketilgan ikkinchi odam mashina tagida yotgani ko‘ringan.
Avariyadan keyin Lacetti ichidan 40—50 yoshlardagi haydovchi tushib kelgani ham ko‘rinib turadi. Voqeaga o‘z ixtiyori bilan yoki beixtiyor guvoh bo‘lganlar esa jabrlanganlarga yordamga oshiqqan.
Hodisa aynan qachon va qayerda sodir bo‘lgani ma’lum emas. “Poyga”da qatnashgan Lacetti’dan tashqari videolavhada o‘tib ketgani ko‘ringan mashinalardan biri — kulrang Spark’da ham davlat raqamining hududiy kodi 90 (Xorazm viloyati) ekanligini ko‘rish mumkin.
Voqeaning boshqa tafsilotlari ma’lum qilinmagan. Ushbu holat yuzasidan hozircha hech qanday rasmiy ma’lumot yo‘q.
Izoh (0)