Samarqanddan Navoiygacha bo‘lgan yo‘llar ta’mirlanishiga 1,8 milliard so‘m sarflandi
Sifatidan haydovchi va yo‘lovchilar norozi bo‘lgan Samarqand va Navoiy shaharlari o‘rtasidagi avtomobil yo‘llarini ta’mirlashga 1,8 milliard so‘mdan ortiq mablag‘ sarflandi, deb xabar bermoqda “Gazeta.uz”.
“O‘zavtoyo‘l” davlat aksiyadorlik kompaniyasi ma’lumotiga ko‘ra, 25-apreldan 20-maygacha “Olma-ota−Bishkek−Toshkent−Termiz” (M-39) xalqaro avtomobil yo‘lining 1037−1113-kilometrlarida, “Samarqand−Buxoro−Turkmanboshi” avtoyo‘lining 0−147-kilometrlarida, Samarqand halqa avtomobil yo‘li (M-37a) ning 33−46-kilometrlarida joriy ta’mir o‘tkazilgan.
Bu yo‘llar Samarqand viloyatining Bulung‘ur, Jomboy, Urgut, Samarqand, Oqdaryo, Ishtixon, Kattaqo‘rg‘on, Narpay, Paxtachi tumanlari, shuningdek Samarqand va Kattaqo‘rg‘on shaharlari orqali o‘tgan. Hozirda “Samarqand−Juma−Kattaqo‘rg‘on” (4R-46) avtoyo‘lining 0−49-kilometrlarida, shuningdek Salmarqand va Shahrisabz orasidagi yo‘lning 20 kilometrida ta’mirlash ishlari olib borilmoqda.
