Xitoyning Nantun shahridan uncha uzoq bo‘lmagan hududdagi yo‘lning 410 metr qismini ikki erkak sotib yuborish uchun qismlarga ajratib olib ketdi, deb xabar beradi Meduza.
Yo‘l Nantun shahri yaqinida 2008-yilda qurilgan va yaxshi holatda saqlangandi. “O‘g‘irlik” ikki hafta oldin yaqin atrofdagi qishloq fuqarosi tomonidan aniqlandi. U mahalliy politsiyaga qo‘ng‘iroq qilib, nima uchun “yo‘l tubidan kavlab olib ketilgani”ga qiziqqan. Mahalliy hukumat bu yo‘lda hech qanday qurilish ishlari qilinishi rejalashtirilmaganini tasdiqlaganidan so‘ng, politsiya jinoiy ish ochdi va tergov boshladi.
Tergovchilar yaqin atrofdagi kuzatuv kameralaridagi yozuvlarni o‘rganib chiqdi va beton plitalarni tashiyotgan yuk mashinasini ko‘rdi. Politsiya Gu familiyali avtomobil egasini so‘roq qilganida, u aybiga iqror bo‘ldi.
“Men bu yo‘ldan deyarli hech kim foydalanmasligini bilardim, shuning uchun pul ishlash maqsadida ozroq qurilish materiali qazib olmoqchi bo‘lgandim”, — dedi qo‘lga olingan shaxs.
Gu o‘zining do‘sti Yan bilan ekskavator va yuk mashinasi yordamida 2 kun ichida 630 tonna beton plitalarni o‘g‘irladi, keyin 12 ming yuan (2,6 ming dollar)ga sotib yubordi. Jinoyatchilar pullarni ishlatib ulgurmasidan oldin politsiya ularni qo‘lga oldi. Gu sud hukmigacha hibsda saqlanadi, Yan esa birinchi chaqiruvdayoq yetib kelish sharti bilan qo‘yib yuborildi.
Izoh (0)