O‘zbekistonlik og‘ir atletikachilar Osiyo kubogida jami 27 ta medalga sazovor bo‘ldi

Joriy yilning 24−29-aprel kunlari Iordaniya poytaxti Amman shahrida og‘ir atletika bo‘yicha yoshlar va kattalar o‘rtasida parallel ravishda Osiyo kubogi bahslari o‘tkazildi, deb xabar bermoqda O‘zbekiston Milliy olimpiya qo‘mitasi matbuot xizmati.

Qit’aning o‘nta davlatidan kelgan 70 nafar sportchi ishtirokida bo‘lib o‘tgan musobaqada o‘zbekistonlik og‘ir atletikachilar jami 15 ta oltin va 12 ta kumush medalga sazovor bo‘ldilar.

E’tiborlisi, Iordaniyaga yo‘l olgan 5 nafar sportchimizning deyarli barchasi ham yoshlar va ham kattalar o‘rtasida bo‘lib o‘tgan musobaqalarda ishtirok etib, sovrindorlar safidan o‘rin egallashdi.

Jumladan, og‘irlik vazni 105 kilogrammgacha bo‘lgan sportchilar musobaqasida O‘zbekiston sharafini himoya qilgan Azimjon G‘aniyev yoshlar o‘rtasida o‘tkazilgan musobaqada 3 ta oltin medalga sazovor bo‘lgan bo‘lsa (dast ko‘tarishda 140 kg, siltab ko‘tarishda 185 kg, ikkikurash yakunlariga ko‘ra 325 kg), kattalar o‘rtasidagi musobaqalarda 1 ta oltin va 2 ta kumush medal sovrindori bo‘ldi.

Terma jamoamiz hisobiga uchtadan oltin medallarni, shuningdek, Ro‘zimurod Aslanov (-56 kg), Sunnatillo Shokirjonov (-85 kg) va kattalar o‘rtasida bo‘lib o‘tgan musobaqalarning o‘zida ishtirok etgan Sardorbek Do‘stmurotov (+105 kg) keltirdi.

O‘smirlar o‘rtasida jahon chempionati sovrindori, andijonlik Ro‘zimurod Aslanov dast ko‘tarishda 100 kg, siltab ko‘tarishda esa 125 kg toshni o‘ziga bo‘ysundirib, har ikki musobaqada ham raqiblarini ortda qoldirishga muvaffaq bo‘ldi. Bu esa tabiiyki sportchimizni ikkikurash yakunlariga ko‘ra ham eng yuqori ko‘rsatkichni qayd etishiga zamin yaratdi. Shu tariqa, iste’dodli sportchimiz Osiyo kubogining bir yo‘la uchta oltin medaliga sazovor bo‘ldi. Ro‘zimurod xuddi shu natija bilan kattalar o‘rtasidagi musobaqalarda uch bor kumush medal bilan taqdirlandi.

Vazni 85 kilogrammgacha bo‘lgan polvonlar o‘rtasidagi musobaqada O‘bekiston sharafini himoya qilgan Sunnatillo Shokirjonov ham dast ko‘tarishda 143 kg, siltab ko‘tarishda esa 161 kg natijani qayd etib, ikkikurash yakunlariga ko‘ra 304 kg ko‘rsatkichga erishdi va u ham uchta oltin medalni terma jamoamiz hisobiga keltirdi. Chirchiq olimpiya zaxiralari kolleji o‘quvchi ushbu ko‘rsatkichlar bilan kattalar o‘rtasida uchta kumush medal sohibi ham bo‘ldi.

2014-yili Incheon (J.Koreya)da bo‘lib o‘tgan XVII yozgi Osiyo o‘yinlarining bronza medali sovrindori Sardorbek Do‘stmurotov vazni 105 kilogrammdan yuqori bo‘lgan polvonlar musobaqada dast ko‘tarishda 155 kg, siltab ko‘tarishda esa 220 kg toshni o‘ziga bo‘ysintira oldi va ikkikurash yakunlari bo‘yicha ham eng yuqori ko‘rsatkichga erishib Osiyo kubogining uchta oltin medalni o‘z kolleksiyasiga qo‘shib qo‘ydi.

Ushbu musobaqada sportchilarimiz orasida ishtirok etgan eng yosh polvonimiz Shaxzod Xudoyberganov (19-aprel kuni 18 yoshga to‘ldi) ham murabbiylar ishonchini to‘liq oqladi. Vazni 77 kilogrammgacha bo‘lgan og‘ir atletikachilar bahsida ishtirok etgan Shaxzod dast ko‘tarishda 135 kg, siltab ko‘tarishda esa 160 kg natijani qayd etib, yoshlar orasidagi musobaqada 1 ta oltin va 2 ta kumush, kattalar o‘rtasidagi musobaqada ham 1 ta oltin hamda 2 ta kumush (jami 2 ta oltin, 4 ta kumush) medalga sazovor bo‘ldi.

Shu tariqa, O‘zbekiston sportchilari yoshlar o‘rtasidagi musobaqalarda umumjamoa hisobida to‘rtinchi, kattalar o‘rtasida esa beshinchi o‘rinni egalladi.