Qozog‘iston hukumati iste’foga chiqqanligi haqida mamlakat bosh vaziri Karim Masimovning matbuot xizmatiga tayanib, “TASS” xabar qilmoqda.
“Hukumat vakillari mamlakat rahbari sifatida qayta saylangan Nursulton Nazarboyevga yozgan maktublarida o‘z vakolatlarini topshirayotganliklarini ma’lum qilgan”, — deyiladi bayonotda.
Vazirlar Mahkamasi yangi rahbarining nomzodini prezident mamlakat parlamentida tanishtiradi.
Nursulton Nazarboyev 26-aprel kuni navbatdan tashqari o‘tkazilgan prezidentlik saylovida 97,7 % ovoz yig‘gandi. 28-aprel kuni u qasamyod qabul qildi.
Qozog‘iston konstitutsiyasiga muvofiq, yangi saylangan prezident o‘z lavozimiga kirishganidan so‘ng hukumat iste’foga chiqishi kerak.
Yangi bosh vazir parlament quyi palatasi (majlis) roziligi bilan prezident tomonidan tayinlanadi.
Karim Masimov Qozog‘iston bosh vaziri sifatida 2007-yildan 2012-yilgacha va 2014-yil aprelidan hozirgi kungacha ishladi.