O‘zbekistonlik og‘ir atletikachilar Osiyo Kubogida eng yaxshi natijalarni ko‘rsatmoqda

Iordaniya poytaxti Amman shahri og‘ir atletika bo‘yicha Osiyo Kubogiga mezbonlik qilmoqda. Ushbu turnirda O‘zbekiston terma jamoasi munosib ishtirok etmoqda, deb xabar beradi “12news.uz”.

O‘zbekiston Og‘ir atletika federatsiyasi bergan xabarga ko‘ra, Osiyo Kubogining birinchi kunidayoq 56 kg vazn toifasidagi polvonlar musobaqasida o‘smirlar o‘rtasidagi jahon chempionati sovrindori Ro‘zimurod Aslanov barcha raqiblarini ortda qoldirdi. U dast ko‘tarishda 100 kg, siltab ko‘tarishda 125 kg toshni o‘ziga bo‘ysundirdi va yakunda ikki kurash natijalari bilan 20 yoshgacha bo‘lgan atletlar orasida 3 ta oltin medalni qo‘lga kiritdi.

O‘zbekiston terma jamoasi g‘aznasiga yana 3 ta oltin medalni Sunnatillo Shokirjonov olib keldi. U 85 kg vazn toifasidagi polvonlar o‘rtasida dast ko‘tarishda 143 kg, siltab ko‘tarishda 161 kg natija ko‘rsatib, umumiy 304 kg toshni o‘ziga bo‘ysundirdi.

Osiyo Kubogining kumush medalini xivalik Shahzod Xudoyberganov qo‘lga kiritdi. Yaqinda 18 yoshga to‘lganiga qaramay, u o‘zidan ancha katta bo‘lgan raqiblariga munosib qarshilik ko‘rsatdi. 77 kg vazn toifasidagi polvonlar o‘rtasida Shahzod Xudoyberganov dast ko‘tarishda 135 kg, siltab ko‘tarishda 160 kg natija ko‘rsatib, umumiy hisobda 295 kg toshni o‘ziga bo‘ysundirdi va 3 ta kumush medalga ega chiqdi.