“Sport-express.ru” sayti Rossiya Premyer-ligasining 25-tur o‘yinlari statistikalarini taqdim etdi. Unda turli ko‘rsatkichlar bo‘yicha turning eng yaxshilari aniqlandi.

O‘zbekiston terma jamoasi yetakchilaridan biri, “Krasnodar” yarim himoyachisi Odil Ahmedov 25-turda hammadan ko‘p aniq to‘p uzatishlarini amalga oshirdi. “Krasnodar”ning 1:0 hisobidagi g‘alabasi bilan yakunlangan “Lokomotiv”ga qarshi uchrashuvda o‘zbek futbolchisi 112 ta to‘p uzatdi, paslarning 103 tasi manzilga aniq yetib bordi. Ushbu bahsda Odil Ahmedov o‘z jamoasi safidagi aniq to‘p uzatishlarining 18,5 foiziga mualliflik qilgan.

Solishtirish uchun, Angliya Premyer-ligasining o‘tgan haftadagi o‘yinlarida to‘p uzatish bo‘yicha eng yaxshi ko‘rsatkichni “Liverpul” sardori Stiven Jerrard qayd etgandi. Jerrard “Vest Bromvich”ga qarshi uchrashuvda 98 ta aniq pas bergan.