Germaniya federal ijtimoiy sudi sug‘urta kompaniyasidan parik (yasama soch) uchun xarajatlarni qoplab berishni talab qilgan 76 yoshli kal fuqaroning da’vosini qanoatlantirmadi. Bu haqda “Segodnya.ua” xabar bermoqda.
Fuqaroning sochi 1980-yillardan to‘kilishni boshlagan, sug‘urta kompaniyasi uning parik uchun xarajatlariga 2006-yilga qadar sug‘urta to‘lovlarini amalga oshirib kelgan.
Biroq keyin sug‘urta kompaniyasi pul to‘lashdan bosh tortgan. Da’vogar kompaniyadan undirmoqchi bo‘lgani pul miqdori ma’lum qilinmagan. Qayd etishlaricha, 76 yoshli fuqaroning nafaqat sochlari, balki qosh va kipriklari ham qolmagan.
Ushbu da’voni ko‘rib chiqqan sudya keksa erkaklardagi soch to‘kilishi sug‘urta kompaniyasiga sun’iy soch uchun xarajatlarni qoplab berishi mas’uliyatini yuklashga asos bo‘ladigan tibbiy ko‘rsatkich emasligini ta’kidladi.
“Erkaklarga xos soch to‘kilishini mehnat layoqatini yo‘qotishga sabab bo‘ladigan kasallik deb bo‘lmaydi”, - dedi sudya. Bundan tashqari, sud qarorida qayd etilishicha, da’vogar o‘zining kal holatini badbashara deb tasdiqlay olmaydi.
Izoh (0)