O‘zini “Ukraina qo‘zg‘olonchilar armiyasi” deb atagan tashkilot Ukrainada so‘nggi shov-shuvli qotilliklar, jumladan bir nechta siyosatchilar va jurnalist Oles Buzinaning o‘ldirib ketilishi bo‘yicha javobgarlikni o‘z bo‘yniga oldi, deb yozadi Kazakhstan Today.
Ukrainalik taniqli siyosatshunos Vladimir Fesenko Facebook’dagi sahifasida yozishicha, u go‘yoki “Ukraina qo‘zg‘olonchilar armiyasi”dan elektron xat olgan. Unda tashkilot Chechetov, Peklushenko, Melnik, Kalashnikov, Buzinaning o‘ldirib ketilishini o‘z bo‘yniga olgan.
Siyosatchi qo‘zg‘olonchilar armiyasi xatidan iqtibos keltirishicha, uning a’zolari “aksilukrain rejimiga qarshi shafqatsiz isyonchilik kurashini tayyorlamoqda”.
Eslatib o‘tamiz, avvalroq Kiyevning Shevchenkovskiy tumanida niqob kiygan ikki noma’lum shaxs jurnalist Oles Buzinani o‘z uyi yaqinida otib ketgani xabar berilgan edi. Ukraina IIV rahbari maslahatchisi xalq deputati Anton Gerashchenko o‘zining Facebook’dagi sahifasida yozishicha, Buzina ko‘k rangdagi Ford Focus avtomobilidan o‘qqa tutilgan. Uning so‘zlariga ko‘ra, mashina raqamlari Latviya yoki Belorussiyaniki bo‘lgan, va “aniq Ukrainaniki bo‘lmagan”.
Izoh (0)