Quddus okrug sudi Isroil sobiq bosh vaziri Exud Olmertga qarshi korrupsiya ishlaridan biri bo‘yicha uch yil avval qabul qilingan oqlovchi hukmni qayta ko‘rib chiqib, uni firibgarlikda va jamoatchilik ishonchini suiiste’mol qilishda aybdor deb e’lon qildi. Bu haqda mahalliy telekanallarga tayanib, “RIA Novosti” xabar berdi.
Hukmning qayta ko‘rib chiqilishi sobiq bosh vazirga boshqa ish bo‘yicha tayinlangan jazo muddatining uzaytirilishiga olib kelishi mumkin.
Sudyalar 30-mart, dushanba kuni Olmertning amerikalik biznesmen Moris Talanskiydan yirik summadagi mablag‘ olganligida jinoyat belgilarini topdi. Olmertga berilgan o‘nlab ming dollarlar nafaqat siyosiy faoliyatga, balki shaxsiy maqsadlarga — hashamatli mehmonxonalarda yashash, birinchi klass bilan transatlantik parvozlar, Italiyada oilaviy sayohatlarga sarflangan.
Eslatib o‘tamiz, 2014-yil 13-may kuni Isroilning sobiq bosh vaziri Exud Olmert poraxo‘rlik uchun olti yillik qamoq jazosiga hukm qilingan edi. Ma’lum bo‘lishicha, u Quddus (Iyerusalim) meri lavozimini egallab turgan paytida Holyland turar-joy majmuasi quruvchilaridan 144 ming dollar, yana boshqa ish bo‘yicha esa 17 ming dollar pora olgan.
Izoh (0)