Germaniya kansleri Angela Merkel, Fransiya prezidenti Fransua Olland va Ispaniya bosh vaziri Mariano Raxoy Fransiyaning Alp tog‘laridagi halokat joyiga yetib keldi, deya xabar bermoqda “Rossiyskaya gazeta”.

Merkel Fransiya tomoniga murojaat qilar ekan, ularga chuqur minnatdorlik bildirdi. U yerda kansler qutqaruvchilar bilan suhbatlashib, qurbonlar jasadlarini qidirish imkoniyatlari haqida ma’lumot olmoqchi. Germaniyalik anatom-patologlar hisoblashicha, qurbonlar shaxslarini aniqlash ikki hafta davom etishi mumkin.

So‘nggi ma’lumotlarga ko‘ra, halokat qurbonlari orasida 72 nafar Germaniya fuqarolari, 45 ispaniyalik, uch nafardan Britaniya va Qozog‘iston fuqarolari, ikki nafardan Yaponiya, Kolumbiya, Avstraliya fuqarolari, shuningdek Niderlandiya, Daniya, Turkiya, Isroil va Meksika fuqarolari bor.

Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.