Taekvando bo‘yicha Qatardagi musobaqada o‘zbekistonlik sportchilar 10 oltin, 6 kumush, 5 bronza medalini qo‘lga kiritdi
Qatar poytaxti Dhxa shahrida taekvondo (WTF) bo‘yicha nufuzli Qatar Open musobaqasi yauniga yetdi. Kechagi kun dasturida o‘tkazilgan o‘smirlar o‘rtasidagi bahslarda O‘zbekiston terma jamoasi a’zolari yana bir nechta medallar jamlanmasini qo‘lga kiritishdi, deb xabar bermoqda “Olamsport”.
-37 kg vazn toifasida o‘tkazilgan bahslarning hal qiluvchi final uchrashuvida o‘zbekistonlik ikki sportchi oltin medal taqdirini hal qildi. Ulug‘bek Rashidov jamoadoshi Shahzod Jo‘rayevni 4:2 hisobida yengib, shohsupaning yuqori pog‘onasiga ko‘tarildi.
E’tiborlisi, -73 kg vazn toifasidagi final bellashuviga ham ikki vakilimiz yetib keldi. Shahboz Shofayziyev Hojiakbar Zokirovni 13:3 hisobida mag‘lub etib, oltin medal bilan taqdirlandi. -63 kg vazndagi vakilamiz Nigora Tursunqulova final bellashuvida qatarlik Niam Konnollidan 19:2 hisobida ustun keldi.
-65 kg vazn toifasidagi o‘smirlar bahsida Islomjon Adhamovga teng keluvchi raqib topilmadi. U oltin medal uchun kechgan bahsda mezbon sportchi Luken Vongni 16:0 hisobida mag‘lubiyatga uchratdi. Yana bir xushxabar – O‘zbekiston yoshlar jamoasi murabbiyi Abduvohid Rahimov mazkur xalqaro turnirning eng yaxshi murabbiyi deb topildi.
Shu tariqa, O‘zbekiston yoshlar, kadetlar va kattalar terma jamoasi to‘rt kun davom etgan “Qatar Ochiq” chempionatida jami 10 ta oltin, 6 ta kumush, 5 ta bronza medalini qo‘lga kiritishdi.
