O’zbekistonda “Kuyla yoshligim” yangi estrada loyihasiga kasting boshlandi

Loyiha mamlakatmizning turli burchaklarida istiqomat qiluvchi yosh ijrochilarni o‘z doirasida birlashtiradi. Uning ishtirokchilarini tanlab olish uch bosqichda bo‘lib o‘tadi. Birinchi bosqichda Respublikamiz viloyatlari bo‘ylab kastinglar o‘tkaziladi va ularda sayyor jyuri o‘z iqtidorini namoyish qilgani kelgan ishtirokchilar chiqishlarini baholab borishadi.

Jyuri qarori asosida tanlov so‘nggida har bir viloyatdan 5−8 nafardan ishtirokchi tanlab olinadi. Shundan so‘nggina ular Toshkentda bo‘lib o‘tadigan keyingi bosqichga o‘tadilar. Ikkinchi saralash bosqichi yakunida yosh ishtirokchilarning 15 nafarigina qoladi va o‘zlarining vokal iqtidorlarini mukammalshtirish imkoniyatiga ega bo‘lishadi. Buning barchasi ikkinchi bosqich doirasida bo‘lib o‘tadi.

6 hafta davomida ishtirokchilar bilimlarini mustahkamlash maqsadida vokal, xoreografiya, aktyorlik san’ati va qo‘shiq yozish bo‘yicha mashqlar tashkil etiladi.

Har hafta oxirida esa hisobot konserti bo‘lib o‘tadi va har bir konsertda eng zaif 3 nominat loyihani tark eta boshlaydi. Final gala konsertda o‘zbek estradasi yulduzlari bilan birgalikda loyihaning barcha ishtirokchilari qatnashadi. Tadbirning kulminatsion nuqtasi esa loyiha finalchilari va g‘oliblarini e’lon qilishdan iborat bo‘ladi.

Shundan keyin barcha ishtirokchilar konsert dasturi bilan mamlakat bo‘ylab sayohat qilishi rejalashtirilgan.