Saakashvili fuqaroligi tufayli Ukrainada korrupsiyaga qarshi kurashish rahbarligidan voz kechdi

Gruziyaning sobiq prezidenti Mixail Saakashvili Ukraina fuqaroligini qabul qilishni istamagani uchun ushbu mamlakatda taklif etilgan Korrupsiyaga qarshi kurashish milliy byurosi rahbarligi lavozimidan voz kechishiga to‘g‘ri keldi, deb xabar bermoqda “Korrespondent.net”.

“Bu yerda fuqarolik masalasi bor edi, men Ukrainaga butunlay ko‘chib kelib, Ukraina fuqaroligini olib, Ukraina davlat boshqaruvi apparatining bir qismiga aylanishim kerak edi – bu bosqichda bunday qilish to‘g‘ri emas. Biroq aksilkorrupsiya byurosini tashkil qilishda yordam beraveraman. Jamoam bu boradagi barcha qonunlarning yozilishida faol qatnashdi, o‘zim ham xabardor bo‘lib turdim”, − dedi Saakashvili.

Qayd etilishicha, avvalroq Mixail Saakashvili vaziyat o‘zgarayotgani tufayli Vataniga qaytishi mumkinligini ma’lum qilgan.