Toshkentning “Bunyodkor” klubi bir kunda ikkita o‘yin o‘tkazdi

Toshkentning “Bunyodkor” jamoasi 2-fevral kuni Antaliya yig‘ini doirasida ikkita nazorat uchrashuvi o‘tkazdi, deb xabar beradi “Uff.uz”.

Dastavval Latviyaning “Daugava” klubi bilan kuch sinaldi. Sergey Lushan ushbu bahsga yoshroq tarkibni maydonga tushirdi. Lekin bahs Latviyaning yetakchi klubi foydasiga hal bo‘ldi — 2:0.

“Bunyodkor” — “Daugava” bahsi yakunlanishi bilanoq xuddi shu maydonda ikkinchi uchrashuv boshlandi. Unda “Bunyodkor” Luganskning “Zarya” jamoasi bilan kuch sinashdi.

Ukraina chempionatining birinchi davrasidan so‘ng 5-pog‘onani band etib turgan jamoaga qarshi bahs juda qiziqarli o‘tdi. Aytish mumkinki, ushbu bahs har ikkala tomon uchun foydali bo‘ldi. “Bunyodkor” — “Zarya” qarama-qarshiligida kuchlar teng keldi — 1:1. “Qaldirg‘ochlar”ning goliga Sardor Rashidov mualliflik qildi.