Rossiyalik deputatlar Germaniyadan Ikkinchi jahon urushidagi hujum uchun tovon talab qilmoqchi

Rossiya Davlat dumasi deputatlari Ikkinchi jahon urushida Sobiq Ittifoqqa qilingan hujumdan ko‘rilgan zararni qoplash uchun Germaniyadan tovon talab qilishni taklif etdi, deb xabar bermoqda “Izvestiya” gazetasi.

Tovon pulini hisoblash uchun maxsus ishchi guruh tuzilishi rejalashtirilmoqda. Rossiya Liberal-demokratik partiyasidan deputat Mixail Degtyarevning so‘zlariga ko‘ra, Germaniya amalda urushdagi vayrongarchiliklar uchun Sobiq Ittifoqqa umuman tovon puli to‘lamagan. GDR bilan o‘zaro tovonlardan voz kechish to‘g‘risida shartnoma imzolangan, GFR va birlashgan Germaniya bilan esa bunday kelishuvlar bo‘lmagan.

Uning eslatishicha, Germaniya hattoki Ikkinchi jahon urushida qatnashmagan davlatlarga ham tovon puli to‘lagan. “Xolokostning 6 million qurboni uchun Isroil Germaniyadan 60 milliard yevrodan ko‘proq olgan. O‘ldirilgan 27 million sovet odamlari esa inkor etilmoqda. O‘ylaymanki, tovon puli 3−4 milliard yevrodan kam bo‘lmasligi kerak”, − dedi deputat.