Pentagon Ukrainaga tankka qarshi raketalar yetkazib berishni taklif qilmoqda — OAV

AQSh hukumati Ukrainaga Javelin tankka qarshi raketalari, o‘qotar qurollar va o‘q-dorilar yetkazib berish imkoniyatini ko‘rib chiqmoqda, deb yozadi “Yevropeyskaya Pravda” The Wall Street Journal’ga tayanib.

Nashr manbasi xabariga ko‘ra, bu boradagi bahsni AQSh prezidentining milliy xavfsizlik bo‘yicha maslahatchisi Syuzan Rays boshlagan, biroq masala hal etilganicha yo‘q.

Ukrainaga o‘lim olib keluvchi qurollar yetkazib berishga aloqador munozara “bu Rossiya prezidentini mamlakat sharqidagi ayirmachilarga berayotgan ko‘magini kamaytirishga majbur qiladimi yoki aksincha, vaziyatni yanada beqarorlashtirishga undaydimi?” degan masalada yuzaga kelgan.

Javelin tankka qarshi raketalari Ukraina armiyasini yanada ko‘chuvchan qilib, ularga rossiyaparast ayirmachilar tomonidan qo‘llaniladigan tanklarga va boshqa zirhli mashinalarga qarshi manyovrlarni tezlik bilan amalga oshirish imkonini berishi kutilmoqda.