Koreyalik hakam o‘z futbol uyushmasini o‘zbek futbolchisiga nisbatan qat’iyroq bo‘lishga chaqirdi

Nafaqat Janubiy Koreyada, balki butun dunyo OAVlarining mavzusiga aylangan Qirol kubogidagi Janubiy Koreya − O‘zbekiston o‘yinidagi mojaroga koreyalik xalqaro hakam Jong Xe Sang ham o‘z fikrlarini bildirdi, deb xabar bermoqda “Stadion.uz”.

Sports Seul nashriga bergan intervyusida koreys hakami ushbu mojaroli vaziyatda Janubiy Koreya futbol assotsiatsiyasi qat’iyatliroq bo‘lishi lozimligini va Tohir Shamsutdinovga og‘irroq jazo qo‘llashga erishish kerakligini ta’kidladi. Odatda, FIFAning qonun-qoidalariga muvofiq, raqibga qo‘l ko‘tarib, qizil kartochka olgan futbolchi kamida 2 ta o‘yindan chetlashtiriladi. Koreys hakami esa bunday jazodan qoniqmasligini jiddiy ravishda bildirdi.

“Qirol kubogi turniri OFK tomonidan o‘tkazilayotgan musobaqa emas. O‘zbekistonlik futbolchiga jazoni yanada kuchaytirish uchun turnir tashkilotchilari bilan faol hamkorlik qilish kerak. Turnir Tailand tomonidan tashkillashtirilganligini hisobga olsak, ular o‘z terma jamoalari emas, begona jamoalar ishtirokidagi mojaro bo‘lganligini uchun bunday masalalarga e’tiborsiz qarashlari mumkin. Bunday vaziyatda futbol assotsiatsiyamiz bu mojaroli vaziyatni shundayligicha qoldirmasligi kerak. Faollikni oshirish kerak”, − dedi koreyalik hakam.

Koreys OAVlarida berilgan xabarlarga ko‘ra, Janubiy Koreya futbol assotsiatsiyasi kechagi mojaroga oid barcha rasmiy hujjatlar va norozilik maktubini allaqachon tayyorlagan. Barcha hujjatlar musobaqa tashkilotchilariga yuborilish arafasida. Janubiy Koreya futbol assotsiatsiyasi ushbu hujjatlarni OFKga yuborishni ham rejalashtirmoqda. Sports Seul yozishicha, agar ish oxirigacha olib borilsa, Tohir Shamsutdinov 1 yildan oshiqroq muddatga barcha musobaqalarda qatnashishdan mahrum bo‘lishi mumkin.