“Real Madrid” qiyin o‘tishi kutilgan haftaning ilk o‘yinida yirik hisobda g‘alaba qozondi. Anchelotti shogirdlari dastlabki davradagi mag‘lubiyat uchun “Real Sosyedad”dan “qasos” oldi, deb xabar beradi “Stadion.uz”.
Uchrashuv mutlaqo kutilmagan holat bilan boshlandi. Mehmonlar burchak to‘pi ishladi va o‘yinning 40-soniyasidayoq hisobni ochdi. Ronaldusiz o‘ynashga majbur bo‘layotgan madridliklar orada 2 daqiqa o‘tib Xamesning bosh bilan urgan goli evaziga hisobni tenglashtirdi.
Oradan bir daqiqa o‘tib, “Sosyedad” yana hisobda oldinga chiqib olishiga bir bahya qoldi. Jarima maydonchasi tashqarisidan yo‘llangan zarbani Serxio Kanales yaqin masofadan darvoza tomon burdi. To‘p esa shundoqqina ustun yonidan o‘tib ketdi. Aytish mumkinki, bu Devid Moyes shogirdlarining o‘yinda eng so‘nggi xavfli hujumi edi.
“Real” o‘yinni to‘la nazorat qildi va uchrashuvning qolgan daqiqalarida 3 ta gol urishga muvaffaq bo‘ldi: Benzemaning 2 ta va Ramosning bir goli “Madrid”ga yirik hisobdagi g‘alabani taqdim etdi. Garet Beyl esa 2 bor paydo bo‘lgan o‘ta qulay vaziyatdan darvozani ishg‘ol qila olmadi.
O‘z ochkolarini 51 ga yetkazib olgan “Real” peshqadamlik qilishda davom etmoqda. Jamoa hafta o‘rtasida “Sevilya”ga qarshi qoldirilgan, hafta so‘ngida esa “Atletiko”ga qarshi 22-tur o‘yinida maydonga tushadi.
Ispaniya chempionati, 21-tur
“Real Madrid” — “Real Sosyedad”: 4:1 (2:1)
Gollar: 0:1 — 1 Elustondo, 1:1 — 3 Xames, 2:1 — 37 Ramos, 3:1 — 52 Benzema, 4:1 — 76 Benzema
“Real Madrid”: Kasilyas, Ramos, Karvaxal, Varan, Marselo, Isko, Xames (Xese, 74), Beyl, Ilyarramendi, Kroos (Xedira, 81), Benzema (Ernandes, 81).
“Real Sosyedad”: Rulyi, Elustondo (Bergara, 63), Martines, Gonsales, Berchiche, Granero, Pardo, Kanales (de la Belya, 46), Elustondo, Priyeto, Vela (Agirreche, 17).
Ogohlantirishlar: Ilyarramendi (31), Marselo (70), Xedira (88), Berchiche (88).
Izoh (0)