Toshkent xalqaro aeroportida 2015-yil oxirigacha rekonstruksiyadan keyin xalqaro reyslarni qabul qilish uchun yangi terminal ishga tushiriladi, deb xabar bermoqda “Podrobno.uz”.
“Mart oyida loyiha hujjatlarini yakunlashni rejalashtiryapmiz. Keyin esa bosh pudratchi aniqlanadi. Joriy yil oxirigacha barcha ishlarni tugatib, terminalni ishga tushirmoqchimiz. U soatiga 300 yo‘lovchiga xizmat ko‘rsatishga mo‘ljallangan”, − dedi Yerdagi inshootlardan foydalanish va aerodromlarni boshqarish departamenti direktori Anton Xodjayan.
“Eski aeroport 1976-yilda ishga tushirilgan. Uning o‘tkazish qobiliyati va texnologik maydonlari o‘sha davr talablari bo‘yicha rejalashtirilgan. O‘shanda kuniga 6 ta reysni amalga oshirardik. Hozirda parvozlar xavfsizligini ta’minlash maqsadida ushbu maydonlar maxsus uskunalar uchun keskin qisqartirilgan.
Yashirmayman, xalqaro terminalda hozir joy yetishmaydi. Bagaj kelishiga uzoq vaqt ketishi bo‘yicha e’tirozlar bor. Afsuski, bu terminalada hattoki bagaj uchun qo‘shimcha tasma o‘rnatishga ham joy yo‘q. Vaziyat birdaniga 15 ta reys keladigan tig‘iz soatlarda ayniqsa keskinlashadi. Mahalliy yo‘nalishlar terminalining eski binosi rekonstruksiya qilinishi ushbu vaziyatni o‘nglash imkonini beradi”, − dedi “O‘zbekiston havo yo‘llari” milliy aviakompaniyasi bosh direktori Valeriy Tyan.
Izoh (0)