2015-yilning 24-yanvar kuni Aloqa, axborotlashtirish va telekommunikatsiya texnologiyalari davlat qo‘mitasi Hay’atining 2014-yilda axborot-kommunikatsiya texnologiyalarini joriy qilish bo‘yicha amalga oshirilgan ishlar sarhisobi, istiqboldagi vazifalarga bag‘ishlangan majlisi bo‘lib o‘tdi. Bu haqda Qo‘mitaning axborot xizmati xabar bermoqda.
Majlisda qayd etilganidek, davlat rahbarining “Xitoy Xalq Respublikasi Davlat taraqqiyot banki ishtirokida O‘zbekiston Respublikasi telekommunikatsiyalar tarmog‘ini modernizatsiya qilish va investitsion loyihalarni amalga oshirish chora-tadbirlari to‘g‘risida”gi qaroriga ko‘ra telekommunikatsiya infratuzilmasini rivojlantirish bo‘yicha 117,6 million AQSh dollariga teng (shu jumladan, Xitoy Davlat taraqqiyot banki tomonidan ajratilgan 100 million AQSh dollaridagi kredit vositalari hisobiga) loyihalar amalga oshirilmoqda. Ushbu yirik loyihalar magistral ma’lumotlar uzatish tarmoqlari imkoniyatini kengaytirishga qaratiladi: xalqaro yo‘nalishda — 10 barobarga (100 Gbit/s gacha), viloyatlar markazlarida — 4 barobar (40 Gbit/s gacha) va tumanlar markazlarida — 10 barobar (10 Gbit/s.gacha).
Mazkur qarorga muvofiq, FTTx texnologiyasi asosida optik aloqa liniyalarini kengaytirish, abonent liniyalarini modernizatsiya qilish, Toshkent shahrida 69 120 dona keng polosali internet portlariga xizmat ko‘rsatuvchi ma’lumotlar almashish uskunasini o‘rnatish uchun 6,9 million AQSh dollari miqdoridagi mablag‘ ajratish ko‘zda tutilgan.
Izoh (0)