Anzur Ismoilov: “Koreya kuchli, ammo g‘alaba qozonishga harakat qilamiz”
O‘zbekiston guruhning 3-turida Saudiya Arabistonini mag‘lub etib (3:1), chorak finalda Janubiy Koreya bilan bahs olib boradigan bo‘ldi. O‘zbekiston milliy terma jamoasi himoyachisi Anzur Ismoilov bu borada OFK rasmiy saytiga intervyu berdi, deb xabar bermoqda “Stadion.uz”.
“Janubiy Koreyaga qarshi o‘yin qiyin bo‘ladi, lekin ko‘ramiz, kim o‘yinga ko‘proq tayyor bo‘lib, yakunda g‘alaba qozonar ekan. Janubiy Koreya terma jamoasi juda tartibli o‘ynaydi va ular mehnatkash. Shu bois o‘yin oson bo‘lmaydi. Maydonga chiqib, ularga qarshi eng yaxshi o‘yinimizni namoyish qilamiz”, — dedi 29 yoshli Anzur.
O‘zbekiston terma jamoasi Koreyani bir marta 1994-yilgi Osiyo o‘yinlarida mag‘lub etgan, xolos. JCh — 2014 saralash bosqichida Toshkentdagi o‘yin 2:2 hisobi bilan yakunlangan bo‘lsa, Seulda koreyaliklar 1:0 hisobida g‘alaba qozongan. O‘zbekiston terma jamoasi yarim himoyachisi Aziz Haydarov ham raqib haqida o‘z fikrlarini bildirib o‘tdi.
“Janubiy Koreya Osiyoning top-jamoasi hisoblanadi. Biz ularning Avstraliyaga qarshi o‘yinini ko‘rdik. Bu jamoani yutish qiyin bo‘ladi. Shubhasiz, bizda ham imkoniyat bor. Barcha jamoalar imkoniyatga ega. Biz Koreyaga qarshi maydonga chiqib, ijobiy natijaga erishishga harakat qilamiz”, — dedi Aziz Haydarov.
