Toshkentda jahon moda yulduzlari hakamligida yosh dizaynerlar tanlovi o‘tkaziladi

Toshkentda 16−20-yanvar kunlari 15 yoshdan 30 yoshgacha bo‘lgan havaskor va professional dizaynerlar o‘rtasida Artlas tanlovi o‘tkaziladi, deb xabar bermoqda “Podrobno.uz”.

Tanlovning maxsus mehmonlari isroillik Kedem Sasson, fransiyalik David Vinsan Kamulyo, gruziyalik Mari Kitesashvili kabi taniqli dizaynerlar bo‘ladi. Bundan tashqari, 16−21-yanvar kunlari Nukus, Urganch, Samarqand va Toshkentdagi ixtisisoslashtirilgan o‘quv muassasalarida boshlovchi dizaynerlar uchun xorijlik modelyerlar tomonidan master-klasslar o‘tkaziladi.

Ishtirokchilarni tanlash viloyatlarda o‘tkaziladi. 17-yanvar kuni yosh dizaynerlar ishlari dastlabki ko‘rikdan o‘tkaziladi. 18-yanvar kuni Yoshlar ijodi saroyida bo‘lib o‘tadigan tanlov ishtirokchilari kolleksiyalari namoyishida final bosqichida qatnashadigan eng yaxshi ishlar e’lon qilinadi.

19-yanvar kuni soat 18:00 da Yoshlar ijodi saroyida xorijlik mutaxassislar hakamligida modalar namoyishi o‘tkaziladi. Tadbir yakunida g‘oliblar aniqlanib, taqdirlash marosimi o‘tkaziladi. 20-yanvar kuni soat 19:00 da Yoshlar ijodi saroyida tanlov g‘oliblari ishlarining yakuniy namoyishi xorijlik mehmonlarning eksklyuziv dizaynerlik ishlari namoyishi bilan birgalikda bo‘lib o‘tadi.