O‘zbekistonda Italiyaning Iveko mikroavtobuslari yig‘ilishi yo‘lga qo‘yilishi mumkin
“O‘zavtosanoat” AK Toshent shahrida Italiya avtosanoatining Iveko Daily mikroavtobuslari yig‘ilishini tashkil etish masalalarini ko‘rib chiqmoqda. Bu haqda “Podrobno.uz” agentligiga asoslanib “Kun.uz” xabar berdi.
Xabarda aytilishicha, Rossiyadan beshta ilk mikroavtobus sinovdan o‘tkazish uchun sotib olingan. Ulardan to‘rttasi Toshkent shahrida marshrut mikroavtobuslari tarzida foydalanish uchun topshirilgan. “Toshshahartransxizmat” vakilining “Podrobno.uz” muxbiriga bergan ma’lumotlariga ko‘ra, bu mikroavtobuslar poytaxt ko‘chalarida sinovdan o‘tkazib bo‘lindi.
Iveko Daily mikroavtobuslari sinovdan o‘tgandan so‘ng, “Toshshahartransxizmat” mutaxassislari undan foydalanishda aniqlangan kamchiliklar bo‘yicha bayonot tayyorlashdi. Bu kamchiliklar asosan O‘zbekiston sharoitlarida foydalanishda besamar bo‘lgan dizel dvigateli bilan bog‘liq. Shuning uchun, ushbu mikroavtobuslarda suyuq yoki siqilgan gazdan foydalanish masalalarini ko‘rib chiqish tavsiya etilgan. Endi bu mikroavtobuslarni yig‘ishni tashkil qilish qarorini qabul qilish “O‘zavtosanoat” AK zimmasiga qoldi, deb axborot beradi “Toshshahartransxizmat” AK vakili.
