O‘zbekistonlik shaxmatchi Javohir Sindorov Moskva turnirini 17-o‘rin bilan yakunladi

Rossiyaning Moskva shahrida shaxmat bo‘yicha T. V. Petrosyan xotirasiga bag‘ishlangan XXIX turnir o‘z yakuniga yetdi. 64 nafar shaxmatchi ishtirok etgan “A” guruhida o‘zbekistonlik maktab o‘quvchilari o‘rtasida 2014-yilgi jahon chempioni Javohir Sindorov (2111) ham qatnashdi. Bu haqda “Olamsport.com” xabar bermoqda.

Eng yosh shaxmatchilardan biri bo‘lgan Javohir so‘nggi 9-turda rossiyalik Anna Sayafarova (1846) bilan hisob-kitob qildi. Qora donalarda harakat qilgan Sindorov yakunda durangga imzo chekdi. To‘qqiz imkoniyatdan 5 ochko jamg‘argan Javohir qo‘shimcha ko‘rsatkichlarga ko‘ra, 64 nafar shaxmatchi orasida 17-o‘rin bilan kifoyalandi.

Musobaqa g‘olibligi qo‘shimcha ko‘rchatkichlarga ko‘ra rossiyalik Konstantin Savenkov (2363)ga nasib etdi. U singari 7,5 ochko jamg‘argan yana bir rus shaxmatchisi Ivan Yeleskiy (2315) ikkinchi o‘rinni egalladi. Aleksandr Tarasov (2171) esa 7 ochko bilan kuchli uchlikka yakun yasadi.