Jismoniy va yuridik shaxslar bevosita kelib yoki telefon orqali, yozma yoxud elektron shaklda, shu jumladan Yagona interaktiv davlat xizmatlari portali orqali o‘zlari uchun qulay va aniq vaqtda notarius tomonidan qabul qilinishni so‘rab murojaat qilish huquqiga ega bo‘ldi. Bu haqda “Gazeta.uz” xabar berdi.
Bu Adliya vazirligining Davlat notarial idoralarida jismoniy va yuridik shaxslarning murojaatlarini navbatma-navbat qayd etish tartibi to‘g‘risidagi nizom (pdf)da ko‘zda tutilgan.
Ushbu hujjat Davlat notarial idoralarida jismoniy va yuridik shaxslarga huquqiy xizmat ko‘rsatish sifatini yanada oshirish va ularga qulaylik yaratish maqsadida qabul qilindi.
Murojaatlar belgilangan shaklda yuritiladigan Notarial harakatlarni amalga oshirish haqidagi murojaatlarni navbatma-navbat qayd etish daftariga qayd qilinadi.
Davlat notarial idorasida faoliyat yuritadigan notariuslar sonidan qat’iy nazar, har bir davlat notarial idorasida yagona daftar yuritiladi. Bunda kelib tushgan murojaatlar notariuslarning ish kunlari va vaqtini hisobga olgan holda har bir notariusga teng taqsimlab beriladi.
Izoh (0)