Mirjalol Qosimov: “Raqibning kuchiga qaramasdan, men o‘z shogirdlarimga ishonaman”

O‘zbekiston milliy terma jamoasi bosh murabbiyi Mirjalol Qosimov 9-yanvar kuni o‘yinoldi matbuot anjumanida ishtirok etdi, deb xabar beradi “Stadion.uz”.

“Biz ushbu musobaqaga uzoq vaqt davomida tayyorgarlik ko‘rdik. Birinchi o‘yin hamisha qiyin bo‘ladi. Boz ustiga, KXDR kabi jamoalarga qarshi o‘yin ikki karra qiyin bo‘ladi. Bu jamoa ikkinchi raqam ostida o‘ynab, raqibni qarshi hujumda ushlashga harakat qiladi.

Shimoliy Koreyaning yopiq o‘yiniga tayyor bo‘lishimiz kerak. Ular haqida yetarlicha ma’lumotga egamiz. Raqibning kuchiga qaramasdan, men o‘z shogirdlarimga ishonaman. Biz KXDRni mag‘lub eta olamiz.

Terma jamoamiz haqida gapiradigan bo‘lsam, tarkibda tajribali va yosh futbolchilar jam bo‘lgan. Tajriba va iqtidor kerakli natijaga erishish uchun bizga yordam beradi, deb o‘ylayman.

Ha, to‘rt yil avval biz yarim finalgacha yetib borgandik, lekin endi u tarix. Albatta, biz musobaqada muvaffaqiyatga erishishni istaymiz. Oldimizga yuqori vazifalar qo‘yilgan. Murabbiylar shtabi va O‘zbekiston terma jamoasi futbolchilari maqsadga erishish uchun qo‘ldan kelgan barcha ishni qiladi”, — dedi Mirjalol Qosimov.

Eslatib o‘tamiz, O‘zbekiston terma jamoasi 10-yanvar kuni KXDRga qarshi maydonga tushadi.