AQSh poytaxtidagi Jorj Vashington universitetining L. Elliott nomidagi Xalqaro munosabatlar maktabida mazkur universitetning Yevropa, Rossiya va Yevroosiyo tadqiqotlari instituti huzuridagi Markaziy Osiyo dasturi bilan hamkorlikda o‘zbek kino san’ati kechasi o‘tkazildi, deb xabar bermoqda “Jahon” axborot agentligi.
Ushbu markaz tadqiqotchilari, aspirantlar, universitet professor-o‘qituvchilari, amerikalik ekspert va tahlilchilar hamda madaniyat arboblari ishtirok etgan tadbir doirasida 1969-yilda Abdulla Qodiriyning “O‘tgan kunlar” romani asosida suratga olingan shu nomdagi filmning namoyishi bo‘lib o‘tdi.
Markaziy Osiyo dasturi direktori M. Lorel xonim O‘zbekistonning AQShdagi elchixonasiga mazkur tadbirni tashkillashtirishdagi hamkorligi uchun minnatdorchilik bildirib, ushbu film o‘zbek klassik kinosining eng ajoyib namunalaridan biri ekanligini ta’kidladi.
Tadbir yakunida AQSh tomoni kelasi yilda Vashingtonda “O‘zbek kinosi haftaligi”ni o‘tkazish va unga O‘zbekiston kinematografiyasining taniqli vakillarini taklif qilishga qiziqish bildirdi.
Izoh (0)