O‘zbekistonda yakka tartibdagi tadbirkor sifatida davlat ro‘yxatidan o‘tmoqchi bo‘lgan kasb-hunar kollejlari bitiruvchilariga imtiyoz beriladi. Bu Soliq va byudjet siyosatining 2015-yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risidagi 2014-yil 4-dekabrdagi Qonunda (pdf) ko‘zda tutilgan.
Ushbu qonun orqali O‘zbekiston Respublikasining Soliq kodeksiga kiritilgan qo‘shimchalarga ko‘ra, yangi ro‘yxatdan o‘tgan yakka tartibdagi tadbirkor, shu jumladan oilaviy tadbirkorlik subyekti qat’iy belgilangan soliqni yakka tartibdagi tadbirkor sifatida davlat ro‘yxatidan o‘tkazilgan oydan keyingi oydan boshlab to‘laydi.
“Kasb-hunar kollejlari bitiruvchilari kollejni tamomlagandan keyin 12 oy ichida yakka tartibdagi tadbirkor sifatida davlat ro‘yxatidan o‘tgan taqdirda, ushbu sanadan e’tiboran qat’iy belgilangan soliqni to‘lashdan olti oy muddatga ozod etiladi. Yakka tartibdagi tadbirkor sifatida davlat ro‘yxatidan o‘tilgan paytdan boshlab 12 oy ichida faoliyat tugatilgan taqdirda, qat’iy belgilangan soliq faoliyat amalga oshirilgan butun davr uchun to‘lanadi”, — deyiladi hujjatda.
Ushbu qonun 2015-yil 1-yanvardan kuchga kiradi.
Izoh (0)