Meksikada bo‘lib o‘tayotgan amputantlar o‘rtasidagi jahon chempionatida yarim finalchilar nomi ma’lum bo‘ldi. Afsuski, O‘zbekiston terma jamoasi chorak finalda kutilmaganda 0:1 hisobida Angolaga yutqazib qo‘ydi, deb xabar bermoqda “Kun”.
Afrikaliklar tomonidan tanlangan taktika ularga g‘alaba keltirdi. O‘yinning 21-daqiqasida olis masofadan urilgan golga O‘zbekiston vakillari javob qaytara olmadi (o‘yin 25 daqiqadan ikki taym davom etadi). Shu tariqa, so‘nggi uchta Jahon chempionatida g‘oliblikni qo‘lga kiritgan O‘zbekiston bu safar “taxt”ni topshiradigan bo‘ldi.
Rossiya terma jamoasi Braziliyani 4:0 hisobida mag‘lub etgan bo‘lsa, Turkiya ham Gaiti ustidan yirik hisobda (3:0) zafar quchdi. Polsha terma jamoasi Argentinani mag‘lub etib (2:1), yarim finalga chiqdi. Yarim finalda Angola — Turkiya, Rossiya — Polsha o‘yinlari o‘tkaziladi.
O‘zbekiston terma jamoasi va chorak finalda yutqazgan boshqa jamoalar 5—8-o‘rinlar uchun bahs olib boradi.
Eslatib o‘tamiz, O‘zbekiston terma jamoasi vakillari chempionat davomida Ukrainani (10:0), Irlandiyani (6:1), Braziliyani (4:0) va Fransiyani (3:0) mag‘lub etgan edi.
Izoh (0)