Toshkent shahrida jamoat transporti ishtirokida 2014-yilning dastlabki o‘n oyi davomida sodir etilgan yo‘l-transport hodisalarning eng ko‘pi Yunusobod tumanida qayd etildi. Bu haqda “Poytaxt transporti” gazetasiga asoslanib “Kun.uz” xabar bermoqda.

Qayd etilishicha, Yunusobodda sodir etilgan hodisalar soni 14 ta bo‘lib, jami YTHlarning 21 foizini tashkil qilmoqda. YTHlardan 7 tasi tumanning Amir Temur, yana 3 tasi Ahmad Donish ko‘chasida sodir etilgan.

“Buni Amir Temur ko‘chasi orqali harakatlanuvchi avtobuslarning tezlikni me’yoridan oshirib harakatlanishlari, alohida yo‘l tasmasi ajratilganligiga qaramasdan har xil yo‘nalishlardagi avtobuslar bir-birlari bilan ‘poyga’ o‘ynashlari, kunning tig‘iz vaqtida transport vositalari oqimi ko‘payishi hamda tirbandliklar vujudga kelayotganligi bilan izohlash mumkin”, – dedi “Toshshahartransxizmat” kompaniyasi Yo‘lovchi transportida harakat xavfsizligini ta’minlash xizmati boshlig‘i Muhammadjon Qahhorov.