O‘zbekiston Respublikasi Mehnat va aholini ijtimoiy muhofaza qilish vazirligi mehnat bilan band bo‘lmagan aholini ishga joylashtirish uchun zamonaviy axborot texnologiyalaridan foydalanadi, deb xabar bermoqda UzDaily.

2015-yilda vazirlik mehnat bozorida faol chora-tadbirlarni amalga oshiradi. Jumladan, vazirlikning hududiy bo‘linmalari ishsizlar, o‘quv muassasalari bitiruvchilari hamda xorijdan qaytib kelgan muhojirlarni ish bilan ta’minlash bo‘yicha xizmatlar taqdim etadi.

Ushbu maqsadga erishish uchun mehnat va aholini ijtimoiy muhofaza qilish bo‘yicha hududiy organlar zamonaviy axborot texnologiyalari va ish izlash dasturlari, shuningdek, vazirlikning www.mehnat.uz saytidan faol foydalanadi. Hozirda vazirlik o‘z rasmiy saytini yangilash ustida ishlayotgani qayd etilgan.

Shuningdek, yaqin orada Yagona interaktiv davlat xizmatlari portali my.gov.uz orqali ish izlayotgan fuqarolarga yordam ko‘rsatila boshlanadi.

Vazirlik bo‘sh ish o‘rinlari yarmarkalarini tashkillashtirishda ham davom etadi. 2015-yilda O‘zbekistonning barcha hududlarida jami 1180 ta bo‘sh ish o‘rinlari yarmarkasi o‘tkazilishi rejalashtirilgan.