Samsung kompaniyasining muhandislaridan tuzilgan volontyorlar jamoasi harakat imkoniyati cheklanganlar uchun ko‘z yordamida boshqariladigan kompyuter sichqonchasini ishlab chiqdi. Bu haqda The Verge ma’lumotiga asoslanib “Parol” nashri xabar berdi.
Ushbu loyiha EYECAN+ deb nomlangan va u Janubiy Koreyaning Seul shahrida sinovdan o‘tkazib ko‘rildi. Bunda tug‘ma falaj bo‘lib tug‘ilgan va Yonsei universitetida onasining yordami bilan o‘qigan hamda tamomlagan Hyung-Jin Shin nomli yigit Samsung’ga yordam bergan.
Shin “ko‘z sichqonchasi” yordamida taxminan 200 ta belgidan iborat bo‘lgan to‘rtta gapni 20 daqiqa davomida yozdi. Bunda u bir marta xato qildi va darhol uni o‘chira oldi. Shu bilan birga EYECAN+ foydalanuvchiga biror joydan boshqa joyga olib qo‘yish imkoniyatini ham beradi. Bu bilan Angry Birds kabi o‘yinlarni ham o‘ynash mumkin bo‘ladi.
Samsung hozircha ushbu qurilmani sotish haqida hech qanday reja tuzgani yo‘q. Ammo uning narxi 150 dollardan 500 dollargacha bo‘lishi taxmin qilinmoqda.