Falastinlik jurnalist Talat Alaviy uzluksiz 50 soat davomida radiomarafonga bir o‘zi boshlovchilik qilib, bu borada Ginnesning rekordlar kitobiga kirishga da’vogarlik qilmoqda, deb xabar berdi “RIA Novosti”.

“Raya FM” radiosi efiriga 24-noyabr, dushanba kuni soat 13:00 da chiqqan jurnalist chorshanba, 26-noyabr kuni soat 14:00 da dasturni yakunlagan. Bu vaqt davomida u o‘nlab odamlar bilan suhbatlashdi: oddiy ishchi va tadbirkorlardan tortib Falastin milliy ma’muriyati rahbari Mahmud Abbos va bosh vazir Rami Hamdallagacha Alaviyga intervyu berdi.

Radiomarafon davomida jurnalist falastinlik ehtiyojmandlar uchun 18 ta nogironlik aravachasi ajratilishiga, ikkita uy ta’mirlanishiga, Xevron shahri tumanlaridan birining aholisi uchun soliq imtiyozlari berilishiga, Iordan daryosining g‘arbiy sohili va G‘azo sektorida 12 ta kichik biznes loyihasiga sarmoya kiritilishiga kelishishga erishgan.

Radiostansiya Ginnesning rekordlar kitobiga berilgan arizaga 10 kun ichida javob kutishini ma’lum qilgan. Bundan oldingi eng uzoq radiomarafon 2013-yil 6−8-dekabr kunlari livanlik Rima Najim tomonidan 46 soat 20 soniya davomida olib borilgan.