Buyuk Britaniyada egizak aka-ukalar bir kunda ota bo‘ldi
Britaniyalik egizak aka-ukalar Jeromm va Jarrell Spenslar bir kunda ota bo‘ldi, har ikkisining rafiqasiga ham bir shifokor doyalik qildi. Bu haqda The Daily Mirror gazetasiga asoslanib “Kun.uz” xabar berdi.
Gazetada yozilishicha, 150 mingtadan 1 ta holatda bunday voqea sodir bo‘lishi mumkin. Xabarda bildirilishicha, egizaklarning ikkalasi ham o‘g‘il farzandli bo‘lgan.
Avvaliga 21 yoshli aka-ukalar farzandlarining taxminiy tug‘ilish kunlari bir xil ekanligidan hayratga tushgan, lekin ulardan biri bolalar bir kunda tug‘ilishi mumkinligiga ishonmagan. Biroq chaqaloqlar Vulverxempton kasalxonasida bir necha soat farq bilan dunyoga keldi. Dastlab Jeromm farzandli bo‘ldi, uning o‘g‘liga Kemeron deb ism qo‘yishdi. Jarrellning o‘g‘liga esa Kassen ismini berishdi.
“Bunaqa voqeani umrimda eshitmaganman. Bu g‘aroyib”, – deydi doyalik qilgan Barbara Kapur.
